Nýir bekkir á skógræktarsvæðunum

 

Hlynur Gauti Sigurðsson hefur starfað sem verktaki á skógræktarsvæðum Skógræktarfélags Garðabæjar í sumar en hann er menntaður landlagsarkitekt og borgarskógfræðingur. Þekking hans og reynsla hefur komið að góðum notum og sem dæmi má nefna að í upphafi starfsins kannaði hann skógræktarsvæði félagsins mjög vel, með nokkurs konar úttekt sem ekki hefur verið gerð áður.

Honum fannst vanta á skógræktarsvæðin eitthvað til að tylla sér á annað en grjót. Smíðaði Hlynur því bekki úr trjábolum sem staðsettir eru í trjásýnireit í Smalaholti, meðfram kurlstígnum upp Sandahlíð og í skóginum í Lundamóa. Bekkirnir eru smíðaðir úr mismunandi trjátengundum þ.e. ösp, furu og greni. Það er von félagsins að útivistarfólk sem leggur leið sína um svæðin njóti þess að tylla sér á þá og hvíla lúin bein áður en það heldur ferð sinni áfram.

 

Haustferð 5. september 2015

 

Haustferðir Skógræktarfélags Garðabæjar á undanförnum árum hafa heppnast ágætlega og mælst vel fyrir. Þar hafa félagsmenn fengið fræðslu um ræktun skóga og tegundaval. Þessar ferðir eru þó ekki síst skemmtiferðir í góðum félagsskap.

 

Á þessu hausti efnum við til ferðar um Kjósina þar sem komið verður við hjá þremur ræktendum.

 

Skógræktarfélagið leggur til rútu í ferðina en þátttakendum er bent á að taka með sér nesti til dagsferðar og klæðnað eftir veðri.

 

Brottför laugardag 5. september kl: 9.00 frá bílastæði á efra Garðatorgi.

 

Þeir, sem hyggjast taka þátt í þessari ferð þurfa að tilkynna það sem fyrst eigi síðar en fimmtudagskvöldið 3. sept nk. til formanns: Erlu Biljar Bjarnardóttur, netfang: bil@internet.is eða síma: 820 8588.

 

Takið laugardaginn 5. september frá til haustferðar skógræktarfélagsins.

Fylgist nánar með á vef félagsins www.skoggb.is

 

Stjórn Skógræktarfélags Garðabæjar

Árleg Brynjudalsferð

Skógræktarfélagar fóru í árlega ferð sína í Brynjudal í Hvalfirði þann 7. júlí síðastliðinn til að vitja um jólatrjáareit félagsins. Reiturinn er inni í  Brynjudal norðanverðum ásamt jólatrjáaræktunarreitum fleiri skógræktarfélaga á suðvesturhorninu.

Erindið var að líta eftir trjánum og gróðursetja nokkrar plöntur í viðbót í reitinn meðal annars blágreni í pottum og fjölpottaplöntur (stafafuru og fjallaþin).

Mikill og góður vöxtur er á trjám í reitnum sem félagar voru mjög ánægðir með að sjá og ekki bar á sviðnum furum né greni sem hefur verið áberandi í vor og sumar.

 

 

 

 

 

Gróðursetning í tilefni þess að 35 ár eru frá kjöri Vígdísar til forseta

Skógræktarfélag Garðabæjar og umhverfisnefnd Garðabæjar stóðu að gróðursetningarathöfn í Lundamóa laugardaginn 27. júní í tilefni að 35 ár eru frá kjöri frú Vígdísar Finnbogadóttur til forseta Íslands.

 

Þrjú birkitré voru gróðursett að hætti frú Vigdísar, fyrir stúlkur gróðursetti Arna Rún Atladóttir 8 ára, fyrir drengi gróðursetti Jökull Snær Gylfason 17 ára sem bæði eru félagar í Skógræktarfélagi Garðabæjar. Jóna Sæmundsdóttir formaður umhverfisnefndar Garðabæjar flutti ávarp og gróðursetti tréð fyrir börn framtíðarinnar. Erla Bil Bjarnardóttir sagði frá sögu Lundamóa sem hefur komið við sögu við ýmsar viðhafnir t.d. er gestir fjölmenns norræns vinabæjarmóts gróðursettu þar í vinabæjarlund ásamt frú Vigdísi Finnbogadóttur forseta. Fyrstu gróðursetningar í Lundamóa voru á árunum 1984 – 1988.

 

Fjöldi fólks lagði leið sína í Lundamóa í tilefni dagsins og naut þar samveru, söngs og harmonikkutóna í skjóli skógarins.

 

Hér má sjá myndband frá gróðursetningunni sem Hlynur Gauti Sigurðsson, verktaki Skógræktarfélags Garðabæjar, gerði.

 

Jóna Sæmundsdóttir gróðursetur fyrir börn framtíðarinnar.

 

Erla Bil Bjarnardóttir formaður Skógræktarfélags Garðabæjar og Jóna

Sæmundsdóttir formaður umhverfisnefndar Garðabæjar.

Jökull Snær Gylfason gróðursetur tréð fyrir drengi.

Arna Rún Atladóttir gróðursetur tréð fyrir stúlkur.

 

 

 

 

 

 

 

 

 

 

 

 

Gróðursetning í tilefni 35 ára afmælis forsetakjörs Vigdísar Finnbogadóttur

Komið verður saman í Lundamóa í tilefni þess að 35 ári eru liðin frá því að frú Vigdís Finnbogadóttir var kjörin forseti Íslands.

Skógræktarfélag Garðabæjar og Garðabær standa saman að gróðursetningu að hætti Vigdísar sem er að gróðursetja þrjár trjáplöntur, eina fyrir stúlkur, eina fyrir pilta og þá þriðju fyrir ófædd börn.

Athöfnin verður laugardaginn 27. júní um allt land sem samstarfsverkefni skógræktarfélaga og sveitarfélaga og hefst hjá okkur í Lundamóa kl. 13:00.

Lundamói er opið svæði austan við Lundahverfi sem hallar að Reykjanesbraut, sem nú er umgirt grænni jarðvegsmön. Margar leiðir liggja að Lundamóa, þar um liggur ein aðalsamgönguleið göngu- og hjólastíga gegnum bæinn, frá Hafnarfirði norður í Kópavog. Svæðið er núna skógi vaxið og tilvalinn útivistarstaður í bæjarlandinu. Umhverfishópar í sumarstörfum hjá bænum hafa verið að leggja stíga út kurli um svæðið til að lokka fólk af aðalstígnum inn á svæðið sem opnast með útsýni til Vífilsstaða.

Lundamói á töluverða sögu, fyrstu gróðursetningar í móann voru á vegum Skógræktarfélags Hafnarfjarðar og Garðabæjar þegar Ólafur Vilhjálmsson á Bólstað, formaður félagsins, gróðursetti í móann á tímabilinu 1984 til 1988. Trjátegundir sem gróðursettar voru þá voru helst birki, stafafurur, sitkagreni og viðjur, þessi tré mynda skógarlund í miðjum Lundamóa. Haustið 1988 var Skógræktarfélag Garðabæjar stofnað eftir að Ólafur og Erla Bil garðyrkjustjóri fengu Smalaholt í landi Vífilsstaða til skógræktar.

Lundamóinn var í sviðsljósinu 26.07.1992 er fjölmennt norrænt vinabæjamót var haldið í Garðabæ. Þá gróðursettu gestir mótsins með frú Vigdísi forseta í fararbroddi plöntur í Vinabæjarlundinn. Áhugi gestanna beindist auðvitað að frú Vigdísi gróðursetja trjáplöntu í reitinn með myndavélar á lofti. Aftur heimsóttu norrænir gesti Vinabæjarlundinn sumarið 2012.

Skjólbeltið sem skermar af móann frá endilangri byggð Lundahverfis var gróðursett í þeim tilgangi að hefta snjó að lóðum og húsum. Því það hafði komið fyrir á snjóþungum vetrum að þakkantar húsa við Efstalund og Hörpulund sliguðust undan snjóþyngslum. Skjólbeltið mætti fara að grisja og opna því það hefur gengt sínu hlutverki.

Rauðgrenitrjám var komið fyrir innan við skjólbeltið eftir að garðyrkjustjóri hafði komið þeim til af fræi úr grenikönglum sem héngu á jólatrénu frá vinabænum Asker í Noregi, fyrir um tveim áratugum síðan.

Lundamói varð fyrir valinu í júní 2001 þegar Skógræktarfélagið gaf Garðabæ 25 birkitré af emblu kvæmi í tilefni 25 ára afmælis kaupstaðaréttinda Garðabæjar. Þá tók Ásdís Halla Bragadóttir þáverandi bæjarstjóri við trjánum og gróðursetti í móann ásamt skógræktarfélögum.

Nú geta íbúar notið Lundamóa sem skjólgóðs og gróðursæls svæðis.

Fjölmennum í Lundamóa laugardaginn 27. júní 2015 kl. 13:00

Erla Bil Bjarnardóttir, formaður Skógræktarfélags Garðabæjar

 

 

 

 

Vinnukvöld hjá Skógræktarfélagi Garðabæjar í maí og júní 2015

 

26. maí (þriðjudagur) – Mæting í aðstöðunni kl. 20:00

 

9. júní (þriðjudagur) – Brynjudalur – Mæting í aðstöðunni kl. 18:00 eða í Brynjudal kl. 19:00

 

 

16. júní (þriðjudagur) – Mæting í aðstöðunni kl. 20:00

 

 

23. júní (þriðjudagur) – Mæting í aðstöðunni kl. 20:00

 

 

Aðstaða Skógræktarfélags Garðabæjar er austan við Vífilsstaðaspítala, þar sem Ellliðavatnsvegur og Vífilsstaðavegur mætast.

 

 

Vel heppnaður aðalfundur

Aðalfundur Skógræktarfélags Garðabæjar var haldinn þann 23. mars í Safnaðarheimilinu Kirkjuhvoli.

Skógræktarfélagið er öflugt, virkt og líklega fjölmennast af frjálsum félögum í Garðabæ. Afkoma félagsins var góð á síðasta starfsári, jólatrjáasala gekk vel með fjöldi fólks lagði leið sína í skóginn.

Breytingar urðu á stjórn er Arndís S. Árnadóttir gaf ekki lengur kost á sér, en hún hefur verið ritari félagsins í fjölda ára. Arndís er ekkert að yfirgefa Skógræktarfélagið þó hún víki úr stjórn til að hleypa að yngra fólki eins og hún sagði á aðalfundinum. Henni eru þökkuð vönduð vinnubrögð fyrir hönd félagsins. Eftirmaður Arndísar í stól ritara verður Hildigunnur Halldórsdóttir og tekur hún formlega við á fyrsta stjórnarfundi eftir aðalfund.

Nýliðar í stjórn eru Einar Örn Jónsson og Huginn Freyr Þorsteinsson sem eru boðnir velkomnir til stjórnarstarfa.

 

Að loknum aðalfundarstörfum og kaffihléi flutti Friðrik Baldursson, garðyrkjustjóri Kópavogs, erindi með myndum um Trjásafnið í Meltungu í Kópavogi. Þessi trjálundur er falin vin á höfuðborgarsvæðinu þar sem finna má margar sjaldséðar trjá- og runnategundir.

Arndís Árnadóttir, fráfarandi ritari Skógræktarfélags Garðabæjar.

Aðalfundur Skógræktarfélags Garðabæjar 2015

Boðað er til aðalfundar Skógræktarfélags Garðabæjar mánudaginn 23. mars nk. í Safnaðarheimilinu Kirkjuhvoli við Kirkjulund og hefst hann kl. 20:00

Dagskrá:

•  Venjuleg aðalfundarstörf
• Kaffihlé
• Fræðsluerindi flytur Friðrik Baldursson garðyrkjustjóri Kópavogsbæjar um Meltungu – trjásafn í Kópavogi.

Trjásafnið í Meltungu er innst í Fossvogsdal á mörkum Kópavogs og Reykjavíkur er fallegur garður sem alltof fáir vita af.

Allir velkomnir

Stjórnin

 

Ábendingar vegna endurskoðunar aðalskipulags

 

Stjórn Skógræktarfélags Garðabæjar hefur komið á framfæri ábendingum vegna endurskoðunar aðalskipulags Garðabæjar 2016-2030. Stjórn félagsins fagnar því að vinna við endurskoðun skipulagsins sé hafin og vill fá að taka þátt í þeirri vinnu frá upphafi. Markmið félagsins er að byggja upp góða útivistaraðstöðu á umsjónarsvæðum félagsins til að íbúar bæjarins og aðrir geti notið þar útivistar og náttúruskoðunar.

 

Ábendingar stjórnar Skógræktarfélags Garðabæjar vegna endurskoðunar aðalskipulags bæjarins má sjá í pdf-skjali hér að neðan.