30 ára útivistarskógur í Smalaholti í hættu

– Bæjaryfirvöld áforma að taka um 15 hektara af skóginum undir golfvöll

Í Smalaholti er allt að 30 ára fjölsóttur útivistarskógur

þar sem lögð hefur verið mikil vinna í gerð stíga og ýmsa aðstöðu.

Skógurinn gegnir jafnframt mikilvægu hlutverki við kolefnisbindingu

sem mun aukast í framtíðinni ef skógurinn fær að dafna.

Ertu sátt/ur við að um 15 hektarar af útivistarskógi í Smalaholti verði teknir undir golfvöll?

Kynntu þér málið á kynningarfundi bæjaryfirvalda 10. desember í Sveinatungu á Garðatorgi 7, kl 17.

Þú gætir haft áhrif á framtíðarskipulag í Smalaholti.

Enn er von um að hægt verði að bjarga skóginum fyrir okkur öll og umhverfið!

Skógræktarfélag Garðabæjar býður til myndakvölds í Safnaðarheimilinu Kirkjuhvoli við Kirkjulund í Garðabæ mánudaginn 25. nóvember 2019 kl. 20.

Erla Bil Bjarnardóttir og Ragnhildur Freysteinsdóttir Skógræktarfélagi Garðabæjar flytja ferðasögu í máli og myndum frá skógræktar- og menningarferð skógræktarfélaga um Ítölsku Alpana í Suður Tyról í haust.

Allir eru velkomnir á myndakvöldið.

Kaffiveitingar í boði Skógræktarfélagsins.

Stjórnin

Í ítölsku ölpunum eru fallegir skógar.

Sinfóníuhljómsveit Íslands lauk starfsári sínu í sumar með því að taka þátt í samstarfsverkefni við Tónverkamiðstöðina. Verkefnið gengur út á að styðja við og hlúa að yngstu tónskáldum landsins og svo skemmtilega vill til að það nefnist Yrkja, rétt eins og verkefni Skógræktarfélags Íslands sem gengur út á að fá skólabörn til að gróðursetja tré. Það var því vel við hæfi að enda daginn á því að yrkja jörðina með gróðursetningu á trjám í Smalaholti, ræktunarsvæði Skógræktarfélags Garðabæjar.

Hljóðfæraleikarar, starfsfólk og fjölskyldur þeirra fjölmenntu í fyrsta skipti í Smalaholt, nánar tiltekið í landnemareit sem Sinfóníuhljómsveitin hefur nú tekið að sér. Hildigunnur Halldórsdóttir, ritari Skógræktarfélags Garðabæjar og Barbara Stanzeit, gjaldkeri félagsins, leiðbeindu fólki um gróðursetninguna og sérvöldu trjáplöntur sem henta í lúpínubreiður. Báðar tengjast þær einnig Sinfóníuhljómsveitinni, Hildigunnur sem fiðluleikari og Barbara sem fastagestur á tónleikum sveitarinnar til margra ára.

Gróðursetningin var liður í því að jafna kolefnisspor hljómsveitarinnar eftir velheppnaða tónleikaferð hennar til Japans. Hljómsveitin lék þar á 12 tónleikum í öllum helstu borgum landsins. Með í för var Vladimir Ashkenazy, aðalheiðursstjórnandi Sinfóníuhljómsveitar Íslands, og japanski píanistinn Nobuyuki Tsujii. Samtals lék hljómsveitin fyrir um 25.000 tónleikagesti við frábærar undirtektir.

Framundan eru fleiri tónleikaferðir erlendis og verður gróðursetning héðan í frá fastur liður í félagsstarfi hljómsveitarinnar, ekki síst ánægjunnar vegna.

Ungir sem aldnir tóku þátt í gróðursetningardeginum í Smalaholti. Lucia Koczot, Oktavía Gunnarsdóttir og Gunnar Andreas Kristinsson hjálpast að við gróðursetningu. Mynd: Steef van Oosterhout.

Hildigunnur Halldórsdóttir, Barbara Stanzeit, Guðný Guðmundsdóttir, Rósa Hrund Guðmundsdóttir og Júlíana Elín Kjartansdóttir. Mynd: Steef van Oosterhout.

Vigdís Másdóttir og Jóel sonur hennar með myndarlega lúpínubreiðu í bakgrunni. Mynd: Steef van Oosterhout.

Gróðursett var í lúpínubreiður og því mikilvægt að velja stórar og þróttmiklar plöntur sem ekki yrðu undir í samkeppninni. Mynd: Steef van Oosterhout.

Nauðsynlegt reyndist að reita vel frá áður en plöntunum var stungið niður. Mynd: Steef van Oosterhout.

Út er komin Starfsskýrsla 2018-2019 fyrir tímabilið frá september 2018 til ágúst 2019. Í henni er fjallað í máli og myndum um allt það markverðasta í starfi félagsins á tímabilinu svo sem Jólaskóg, Líf í lundi, grisjun og umhirðu skógræktarsvæðanna auk þess sem litið er til komandi verkefna.

Tuttugu skógræktarfélagar tóku þátt í árlegri haustferð Skógræktarfélags Garðabæjar um Suðvesturland laugardaginn 14. september í frekar rysjóttu veðri. Skoðaðir voru skógar bæði á Mógilsá í Kollafirði þar sem Aðalsteinn Sigurgeirsson, fagmálastjóri Skógræktarinnar, tók á móti hópnum og Álfholtsskógur í Hvalfirði en þar tók Reynir Þorsteinsson, formaður Skógræktarfélags Skilmannahrepps, á móti okkur. Báðir þessir skógar eru ákaflega fallegir og fjölbreyttir sem gaman er að heimsækja og njóta, svo ekki sé talað um að geta verið í logni þegar vindurinn blæs allt í kring.

Haustferðin var afskaplega ánægjuleg, fróðleg og nærandi þrátt fyrir að haustlægð væri með í för.

Barbara Stanzeit, gjaldkeri Skógræktarfélagsins, hefur sáð fyrir og ræktað ófáar trjáplönturnar fyrir félagið í gegnum tíðina. Í ferðinni sýndi hún okkur inn í gróðurhús við Mógilsá þar sem félagar í Trjáræktarklúbbnum hafa aðstöðu til að ala upp plöntur.

Í haustferðum félagsins er gestgjöfum færðar plöntur sem oftar en ekki koma úr ræktun Barböru. Barbara afhendir Reyni Þorsteinssyni, formanni skógræktarfélags Skilmannahrepps, plöntur með þakklæti fyrir móttökurnar.

Hilmar Ingólfsson og Hugrún Jóhannesdóttir tóku höfðinglega á móti hópnum í sumarbústað þeirra hjóna í Svarfhólsskógi í Svínadal. Gróður er mjög fjölbreyttur og fallegur við bústaðinn.

Haustferð Skógræktarfélags Garðabæjar verður farin laugardaginn 14. september um Suðvesturland
Félagið leggur til rútu til ferðarinnar en þátttakendur þurfa að hafa með sér hádegisnesti.

Dagskrá:
• Lagt verður af stað frá bílastæðinu bak við blokkirnar við Kirkjulund 12 og 14, kl. 9:00.
• Fyrsta stopp er við Mógilsá, fræðsla og leiðsögn um skóginn.
• Álfholtsskógur í Hvalfjarðasveit – leiðsögn um skóginn. Borðum hádegisnesti í skóginum þar sem Skógræktarfélag Skilmannahrepps býður upp á kaffi og kakó.
• Heimsókn til Hilmars og Hugrúnar í sumarbústaðaland þeirra í Svarfhólsskógi í Svínadal.
• Síðasta stopp verður í Brynjudal í Hvalfirði þar sem jólatrjáareitur Skógræktarfélags Garðabæjar verður heimsóttur.
• Heimkoma er áætluð um kl. 17.

Þeir, sem hyggjast taka þátt í þessari ferð, þurfa að tilkynna það sem fyrst og eigi síðar en fimmtudags-kvöldið 12. september til Kristrúnar Sigurðardóttur formanns, í síma 866-3164 eða á netfangið kristrun@islandia.is

Haustferð Skógræktarfélags Garðabæjar verður farin laugardaginn 14. september.

Styttist í haustferð

Haustferð Skógræktarfélags Garðabæjar verður farin laugardaginn 14. september n.k. um Suðvesturland.
Félagið leggur til rútu til ferðarinnar en þátttakendur þurfa að hafa með sér nesti. Heimsótt verða áhugaverð ræktunarsvæði í skógum og sumarhúsaeigendur heimsóttir. Nánar auglýst síðar.

Haustferðir Skógræktarfélags Garðabæjar eru í senn fræðandi og skemmtilegar.

Rúmlega hundrað manns á öllum aldri naut veðurblíðunnar á skógardegi í Sandahlíð laugardaginn 22. júní. Fjölskyldufólk var áberandi meðal gesta enda dagskráin sérstaklega skipulögð með það í huga. Meðal annars gátu gestir lært að tálga flautur, grilla brauð og sykurpúða yfir opnum eldi, spila á slagverk úr grisjunarviði og farið í fræðandi og skemmtilegan ratleik um skóginn.

Gleði skein úr hverju andliti og jafnt gestir sem skipuleggjendur hjá Skógræktarfélagi Garðabæjar voru ánægðir með hvernig til tókst. Viðburðir sem þessir eru afar mikilvægir í starfi skógræktarfélagsins enda uppgötva þá margir þær útivistarperlur sem skógræktarsvæðin eru og þá góðu aðstöðu sem þar hefur verið byggð á undanförnum árum og áratugum.

Þetta er annað árið í röð sem Skógræktarfélag Garðabæjar stendur að skógardegi í Sandahlíð í tengslum við ,,Líf í lundi“ en það er átak á vegum skógargeirans sem miðar að því að fá fólk til að koma saman í skóginum og gera sér glaðan dag. Ekki var annað að sjá en að það hefði tekist fullkomnlega að þessu sinni.

Jafnt ungir sem aldnir hafa gaman af því að grilla sykurpúða og snúrubrauð yfir opnum eldi. Mynd: Einar Jónsson

Boðið var upp á leiðsögn í tálgun og snéru sumir heim úr skóginum með handsmíðaða flautu í vasanum. Mynd: Einar Jónsson

Ein besta leiðin til að kynnast skóginum í Sandahlíð og umhverfi hans er að bregða sér í fróðlegan og skemmtilegan ratleik um hann. Mynd: Einar Jónsson

Gestir njóta veðurblíðunnar í Sandahlíð. Mynd: Jónatan Garðarsson

Grisjunarviður er til margra hluta nytsamlegur og fengu gestir að spreyta sig á að galdra fram ýmis hljóð úr viðarbútum sem féllu til í skóginum. Mynd: Heimir Sigurðsson

Líf og fjör í skógarrjóðri. Mynd: Einar Jónsson

Skógræktarfélag Garðabæjar efnir til Skógardags í Sandahlíð laugardaginn 22. júní kl. 13-15. Í boði verður fjölbreytt dagskrá í faðmi skógarins þar sem allir í fjölskyldunni ættu að finna eitthvað við sitt hæfi.

• Bakað verður yfir eldi (snúrubrauð og sykurpúðar)
• Skógarslagverk
• Tálgun
• Ratleikur
• Skógarganga o.fl.

Dagskráin er liður í Lífi í lundi, samstarfsverkefni ýmissa aðila í skógargeiranum sem gengur út á að bjóða fólki að gera sér glaðan dag í skógum víða um land.

Allir velkomnir!

Mikið rusl í Smalaholti

Tíu vaskir skógræktarfélagar tíndu rusl í Smalaholti í blíðunni 30. maí. Verkefnið er liður í hreinsunarátaki Gar’abæjar og jafnframt fjáröflun fyrir félagið. Áberandi var plast og plasteinangrun sem fokið hafði af byggingarsvæðum í nágrenninu en hvimleiðast er mikið magn af sígarettustubbum sem eru sérstaklega áberandi á áningarstöðum í skógarrjóðrum og á bílastæðum.