Undirritun samstarfsamnings

Gunnar Einarsson bæjarstjóri undirritaði samstarfsamning Garðabæjar við Skógræktarfélag Garðabæjar ásamt stjórnarfólki félagsins.

Stjórn félagsins hefur unnið að endurnýjun samstarfsamningsins sem bæjarstjórn samþykkti 2. mars síðastliðinn.

Undirritunin fór fram á aðalfundi Skógræktarfélagins sem haldinn var í Safnaðarheimilinu Kirkjuhvoli.

Þegar hefðbundin aðalfundarstörf voru að baki og samningurinn undirritaður, hélt gestur fundarins, Ólafur Njálsson frá gróðrarstöðinni Nátthaga, fróðlegt erindi um þintegundir.

Aðalfundur Skógræktarfélags Garðabæjar 2017

Aðalfundur Skógræktarfélags Garðabæjar verður haldinn í safnaðarheimilinu Kirkjuhvoli við Kirkjulund mánudaginn 13. mars 2017 og hefst kl. 20:00.

DAGSKRÁ:

1.         Venjuleg aðalfundarstörf:

1.1.           Kjör fundarstjóra

1.2.           Skýrsla stjórnar 2016

1.3.           Reikningar félagsins 2016

1.4.           Ákvörðun um félagsgjöld 2017

1.5.           Stjórnarkjör. Kjósa skal formann, þrjá aðalmenn og tvo til vara auk skoðunarmanns

2.         Önnur mál

3.         Kaffiveitingar í boði félagsins

4.         Erindi Ólafs Njálssonar frá Gróðrarstöðinni Nátthaga: „Sitt lítið af hverju um þintegundir og fleira gott“.

Allir eru hjartanlega velkomnir.

Stjórn Skógræktarfélags Garðabæjar

Skógræktarfélag Garðabæjar hefur gert athugasemdir við tillögur að aðalskipulagi Garðabæjar 2016-2030 en tillögurnar voru forkynntar í haust. Athugasemdir skógræktarfélagsins lúta að skipulagi í útmörk bæjarins þar sem umsvif félagsins hafa verið mest.

Hægt er að kynna sér tillögurnar hér að neðan.

Fjölmenni í Jólaskógi

Opinn jólaskógur Skógræktarfélags Garðabæjar var í Sandahlíð laugardaginn 10. desember.

Fjölmargir lögðu leið sína í skóginn að þessu sinni, einkum fjölskyldufólk, enda hin besta skemmtun fyrir unga sem aldna að þramma um fallegan skóginn í leit að hinu eina sanna jólatré sem það fær svo að höggva sjálft og fara með heim. Þegar fólk hafði fundið draumatréð sitt, pökkuðu sjálfboðaliðar Skógræktarfélagsins því í net og buðu svo upp á kakó með piparkökum. Krakkarnir prófuðu leiktækin á svæðinu og allir undu sér vel í skóginum enda prýðisgott veður.

Jólaskógurinn var að þessu sinni í Sandahlíð en hefur verið undarfarin ár í Smalaholti. Það er ágætt úrval tegunda að vaxa upp í jólatrjáastærð í Sandahlíð og þar er einnig betra rými til að taka á móti mörgum bílum í einu.

Skógræktarfélag Garðabæjar verður með árlegan jólaskóg laugardaginn 10. desember kl. 12-16.

Athugið. Að þessu sinni verður jólaskógurinn á nýjum stað, í Sandahlíð (sjá staðsetningu á korti hér að neðan).

Guðni Guðjónsson – Minning           

Fæddur 12.04.1931, dáinn 21.10.2016

Guðna Guðjónssyni kynntumst við er hópur fólks kom saman haustið 1988 og vann að stofnun skógræktarfélags í Garðabæ. Skógræktarfélag Garðabæjar var í kjölfarið stofnað 24. nóvember 1988. Félagsstarfið varð strax blómlegt og hittust skógræktarfélagar til vinnu og samveru á þriðjudagskvöldum í maí – júlí. Eftir gróðursetningu og önnur störf á skógræktarsvæðunum var sest niður með kaffibrúsann og spjallað saman. Alltaf var Guðni ásamt Barböru sinni til í sjálfboðastörf fyrir Skógræktarfélagið, síðan tók hann sæti í stjórn félagsins á aðalfundi 1999.

Á stjórnarfundi þann 31. janúar 2000 lagði formaður til að félagið fengi starfsmann til umsjónar á skógræktarsvæðunum sem hafði fjölgað og stækkað, það voru Smalaholt, Sandahlíð, Hnoðraholt, Tjarnholt og Hádegisholt. Guðni bauð fram sína krafta til starfa á stjórnarfundi 21. mars 2000, sem var fagnað með lófataki. Þetta var eftir að hann hafði lokið sínu hefðbundna ævistarfi að leggja hug sinn og krafta í þágu skógræktarsvæðanna með því að hlú að plöntum að gefa þeim áburð svo þær yxu betur. Hann tók á móti börnum frá leikskólum og skólum á skógræktarsvæðin, leiðbeindi og aðstoðaði við að gróðursetja Ykju plöntur. Fór yfir gróðursetningar grunnskólanema og athugaði hvort betur mætti fara.

Guðni vildi ekki þiggja laun fyrir störf sín fyrir Skógræktarfélagið sagði þetta ekki vinnu þó hann dundaði við plöntur á sumrin í um áratug. En honum þóttu kynnisferðir skógræktarfélaganna bæði fróðlegar og skemmtilegar í góðum félagsskap skógræktarfólks sem félagið styrkti hann til þátttöku.

Fyrir hönd Skógræktarfélags Garðabæjar eru öll störf og gott viðmót Guðna þökkuð. Færum Barböru, börnum þeirra og fjölskyldu innilegar samúðarkveðjur.

Erla Bil Bjarnardóttir

Vel mætt á myndakvöld

Skógræktarfélag Garðabæjar bauð til myndakvölds frá ferð skógræktarfélaganna um Frönsku alpanna þann 7. nóvember. Ferðin var skipulögð af Skógræktarfélagi Íslands og ferðaskrifstofunni Trex.

Ferðin var farin dagana 13.-20. september 2016 og var aðalleiðsögumaður hinn franski Gabriel Pic sem var við nám og störf hjá Skógræktarfélagi Íslands um nokkurra ára skeið.

Sigurður Þórðarson,  einn ferðalanganna og stjórnarmaður í Skógræktarfélagi Íslands, tók að sér að segja ferðasöguna með myndum úr ferðinni.

Ferðin var í alla staði vel heppnuð með allskonar menningarlegu ívafi.

Formaður Skógræktarfélags Garðabæjar Erla Bil Bjarnardóttir minntist sjötíu ára afmælis Skógræktarfélags Hafnarfjarðar í sýningarhléi. Hún kallaði fram viðstadda skógræktarfélaga úr Hafnarfirði og færði nágrannafélaginu ritin af Sögu Garðabæjar að gjöf, þar sem skráð er meðal annars saga fyrrum Álftaneshrepps.

Erla Bil Bjarnardóttir, formaður Skógræktarfélags Garðabæjar, afhendir fulltrúum Skógræktarfélags Hafnarfjarðar gjöf í tilefni

sjötugsafmælis félagsins.

Myndasýning úr frönsku ölpunum

Skógræktarfélag Garðabæjar býður til myndakvölds um ferð
skógræktarfélaga um Frönsku Alpanna daganna 13. – 20. september 2016.

Mánudaginn 7. nóvember í Safnaðarheimilinu Kirkjuhvoli við
Kirkjulund og hefst kl.20:00

Sigurður Þórðarson mun segja ferðasöguna með myndum.
Ferðin var skipulögð af Skógræktarfélagi Íslands í samvinnu við ferðaskrifstofuna Trex.

Allir velkomnir

Stjórnin

Myndir úr haustferð

Félagar í Skógræktarfélagi Garðabæjar héldu í árlega haustferð sína laugardaginn 10. september. Að þessu sinni lá leiðin um sveitir Suðurlands þar sem komið var við á þremur áhugaverðum stöðum, gróðrarstöðinni Kjarri í Ölfussi, sumarbústaðalandi í Vaðnesi og á Skeiðum þar sem Valgerður Auðunsdóttir frá Húsatóftum tók á móti hópnum. Fleiri myndir úr ferðinni má nálgast í þessu albúmi.

Dagskrá haustferðar Skógræktarfélags Garðabæjar

Laugardaginn 10. september býður Skógræktarfélagið til haustferðar austur fyrir fjall.

Heimsóttir verða áhugaverðir staðir:

·         Gróðrarstöðin Kjarr í Ölfusi.

·         Um Skeiðin verður farið um í leiðsögn Valgerðar Auðunsdóttur frá Húsatóftum.

·         Ræktun við sumarbústað í Vaðneslandi í Grímsnesi.

Hafið með ykkur nesti til dagsferðar, skjólfatnað og góða skapið.

Lagt verður af stað frá Garðatorgi efra kl. 9:00, áætluð heimkoma um kl. 19:00.

Tilkynnið þátttöku til Barböru Stanzeit í síma 699 6233 eða á netfangið barbaras@internet.is

Stjórnin